BUTUAN CITY – Hingpit nang nahatud hangtud niadtong mi-aging gabii ngadto sa mga municipal ug city treasurer’s offices ang tanang mga official ballots alang sa tanang polling centers sa Caraga Region nga gamiton sa May 12 national and local elections.
Sa eksklusibong pakighinabi sa Bombo Radyo Butuan, gibutyag ni Commission on Elections kon COMELEC-Caraga Assistant Regional Director Atty. Geraldine Samson nga tumong sa komisyon nga didto ihatud sa mga treasurer’s offices ang mga balota aron duna’y check and balance ilabina nga ang mga election officers ang magkupot sa mga Automated Counting Machines kon ACMs.
Samtang ang mga ACMs, padayon na usab nga gipanghatud ngadto sa ilang mga municipal ug city offices alang sa pag-claim na unya sa mga membro sa electoral boards karong Mayo 6 ka-uban ang mga test ballots nga gamiton sa final testing ug sealing sa mga lalawigan sa Agusan del Norte ug Surigao del Norte nga sundan sa ubang mga lalawigan sa sunod nga mga adlaw.
Wala matud pa’y angayang kabalak-an alang sa seguridad sa eleksyon tungod kay gihimo mipasalig na niini ang Philippine National Police, Armed Forces of the Philippines ug ang Philippine Coast Guard.
