BUTUAN CITY – Hingpit nang napasakaan og kaso sa ginsakupan sa Butuan City Police Station kon BCPS-4 si Atty. Rolando Gualbert Salise human ang pagpanghuraw niini og pagpabuto og armas atubangan sa mga mag-uuma sa Brgy. Tagabaca ning siyudad.
Sa eksklusibong pakighinabi ning sibyahan, gibutyag ni station commander P/Chief Insp. Ephraim Detoya nga niadtong Biyernes nila napasaka pinaagi sa inquest proceedings ang mga kasong illegal discharge og illegal possession of firearms batuk kang Salise.
Gipasabot sa opisyal nga mas bug-at nga silot ang bugti sa kasong illegal possession of firearms kumpara kung ipa-ilalom kini sa kalapasan sa election gun ban.
Gipasabot sa opisyal nga tungod kay ubos sa martial rule karon ang pulo sa Mindanao, usa sa gidili ang pagdala og armas og mas labaw pang gidili ang pagpabuto niini.
Apan bisan pa man sa maong kaso, temporaryong nahatagan og kagawasan ang suspek human nakatunol og pyansa sa mga kasong iyang gi-atubang.
Gipasabot pa ni Detoya nga kung ila nang maduso sa korte ang kaso, wala na sila’y hold niini ilabina sa mamahimong desisyon sa judge nga naghupot sa kaso. (Beth Ruiz)
