BUTUAN CITY – Nagpadayon karon ang kampanya sa lokal nga kagamhanan sa Butuan City alang sa pagpanalipod sa kahimsog sa panglawas sa mga magtutungha pinaagi sa 2026 Bakuna Eskwela Program aron mabakunahan ang ilang mga anak nga kwalipikado sa maong programa.
Kini subay sa pagpadayon sa siyudad paghatod sa importanteng serbisyong panglawas ngadto sa mga estudyante ug ilang pamilya ka-abag ang City Health Department, Department of Health kon DOH-Caraga, ug Department of Education kon DepEd-Butuan City Division.
Ubos niini nga programa, hatagan og bakuna batok sa tipdas ug rubella o MR, lakip na sa tetanus ug diphtheria o TD, ang mga kwalipikadong Grade 1 ug Grade 7 learners, samtang ang mga babayeng magtutungha sa Grade 4 ug Grade 5, hatagan usab og bakuna batok sa human papillomavirus o HPV aron malikayan ang cervical cancer.
Sigon ni Butuan City Mayor Law Fortun, mahinungdanon ang kooperasyon sa mga pamilya ug komunidad aron mapanalipdan ang mga bata batok sa mga sakit nga mapugngan pinaagi sa pagbakuna.
Gi-awhag niya ang publiko nga suportahan ang pagbakuna aron masiguro ang mas himsog ug luwas nga kaugmaon sa mga kabataan ning siyudad sa Butuan.
