BUTUAN CITY – Nakadaog og Best Oral Presentation Award ang Agusan del Norte atol sa Rabies in Asia–Rabies in Borneo International Conference 2026 nga gipahigayon sa Kuching, Sarawak, Malaysia. Ang maong pag-ila tungod sa epektibong pagpatuman sa One Health approach batok sa rabies.
Gi-ila ang mga programa sa Lokal nga Kagamhanan sa Agusan del Norte alang sa kahimsog sa tawo ug hayop, lakip ang pagbakuna sa mga iro ug iring, rabies surveillance, post-exposure services, paggamit sa digital innovations, ug koordinasyon sa nagkalain-laing ahensya ug mga komunidad.
Dako kini og epekto sa katawhan tungod kay ang mas lig-on nga rabies prevention ug control program makatabang sa pagpakunhod sa risgo sa rabies infection, ilabina sa mga komunidad nga adunay kaso sa pinaakan sa iro.
Gipakita usab niini nga pinaagi sa lig-on nga polisiya, koordinadong serbisyo ug pakigtambayayong sa katawhan, mas maprotektahan ang panglawas ug kaluwasan sa mga lumolupyo sa probinsya.
