BUTUAN CITY-Mikaylap na ngadto sa 92 ka barangay sa Pilipinas ang African Swine Fever o ASF, sumala sa Department of Agriculture kon DA, tungod sa padayong pagdaghan sa mga aktibong kaso ug bag-ong natala nga impeksyon sa pipila ka rehiyon.
Sigon ni DA Assistant Secretary Arnel de Mesa, padayon ang koordinasyon sa ahensya ug mga lokal nga kagamhanan aron mapugngan ang pagbalhin sa mga apektadong baboy, samtang hugot nga gipatuman ang quarantine checkpoints ug pagdili sa pagbiyahe sa buhing baboy, walay hustong dokumentong karne, ug mga produktong baboy gikan sa mga red zone.
Gidasig usab ang mga magbababoy nga palig-onon ang biosecurity pinaagi sa regular nga pagdisimpekta sa kulungan ug paglimit sa pagsulod sa dili awtorisadong mga tawo, samtang gipadayon sa DA ang targeted culling sa mga baboy sulod sa usa ka kilometro gikan sa apektadong uma aron mapugngan ang dugang nga pagkaylap sa virus.
Nanawagan usab ang gobyerno sa publiko nga ireport dayon sa lokal nga panggobyerno o opisina sa agrikultura ang bisan unsang kadudahang sintomas o kalit nga pagkamatay sa mga baboy.
