BUTUAN CITY – Nakakuha og laing duha ka bag-ong Guinness World Records si Austin Head, usa ka fitness instructor sa New York nga gibansagang The Lunge King samtang nagsul-ob og 20 ka librang weighted vest.
Si Head, nga lumad sa Kilgore, Texas apan karon nagtrabaho isip fitness instructor sa New York, nagsul-ob og 20 ka librang vest ug nakahimo og 71 ka lunges sulod sa usa ka minoto og 200 ka lunges sulod sa tulo ka minuto nga nakapahimo kaniya nga makadaug og duha ka Guinness World Records.
Tungod niini, nakuha niya ang mga titulo alang sa pinakadaghan nga lunges nga nahimo samtang nagdala og 20 ka librang karga sulod sa usa ka minuto og sulod sa tulo ka minuto.
Sa miaging tuig 2024, narekord usab niya ang mga titulo alang sa pinakalayong gelay-on nga nalakaw pinaagi sa lunge sulod sa usa ka oras og pinakadaghan nga lunges nga nahimo sulod sa usa ka oras.
Aron makahimo og lunge, kinahanglan nga motindog ka nga tul-id, molakang ka og usa ka tikang, Ilubong nimo ang imong lawas pinaagi sa pagduko sa duha ka tuhod hangtod ang likod nga tuhod hapit makahikap sa salog og mobalik dayon ka sa orihinal nga posisyon ug usbon sa pikas nga tiil.
Ang iyang pinakabag-ong record attempts nakatigom usab og 3-mil 200 dolyares nga donasyon alang sa Broadway Cares/Equity Fights AIDS, usa ka organisasyon nga nagtabang sa pakigbatok batok sa AIDS.
