BUTUAN CITY- Nakaplagang wala nay kinabuhi ang usa ka edarang lalaki samtang naglutaw-lutaw daplin sa baybayon sa Purok 1, Barangay Baucawe, Liangga, Surigao del Sur kagahapong adlawa Domingo, Abril 19, 2026.
Naila ang maong biktima nga si Carlos Millan, 73 anyos, minyo, mananagat, ug residente sa Purok 6, Barangay Horsan, San Agustin sa maong lungsod. Base sa inisyal nga imbestigasyon, ang lawas unang nakit-an sa duha ka menor de edad samtang naglakaw sa baybayon.
Gikompirma sa mga lokal nga mangisdaay ug sa pamilya sa biktima ang iyang identidad human sila makontak sa kapulisan. Sumala pa sa pamilya, katapusang nakita si Millan niadtong Abril 16, 2026, alas 2:00 sa hapon samtang nangandam mangisda apan wala na kini nakapauli.
Tungod niini, nag-post sila og mga hulagway sa social media aron makatabang sa pagpangita kaniya. Ang maong patay’ng lawas gidala gilayon sa duol nga punerarya sa maong lugar samtang nagpadayon ang imbestigasyon sa kapulisan aron matino ang hinungdan sa iyang kamatayon.
