Mga oil companies, nangita na og nasud nga kuhaan og supply sa lana tungod sa padayong kagubot sa Middle East

BUTUAN CITY – Gipaniguro ni Department of Energy Secretary Sharon Garin nga duna pa’y igong supply sa lana apan kung kini kulangon, wala matud pa’y angayang kabalak-an tungod kay nangita na sila og laing mga nasud nga ilang kakuhaan.

Tungod kini sa nagpadayong tensyon sa Middle East nga maoy nag-unang tuburan sa lana dinhi sa nasud.

Sumala ni Garin, base sa reports nga gipadala sa mga kompanya sa lana ngadto sa ilang buhatan, mulungtad pa og 50 ngadto sa 60 ka mga adlaw ang supply apan kung hurot-hurot na unya padayon pa gihapon ang giyera sa tunga-tungang sidlakan, ila nang gikonsidera ang pagpalit og lana sa mga nasud nga sakop sa North ug South Americas, Urupa, Russia ug Australia.