BUTUAN CITY- Mingkabat ngadto sa P800,000 ang natalang kadaot sa sunog nga nahitabo sa Barangay Pagatpatan, Butuan City kagahapon sa hapon, Miyerkules, Enero 28, 2026.
Sumala ni FSINSP Ronald Vasquez sa Bureau of Fire Protection kon BFP Butuan, dali nilang narespondehan ang insidente kauban ang City Disaster Risk Reduction and Management Office kon CDRRMO ug mga Chinese volunteers human madawat ang tawag kabahin sa sunog. Sigon ni Vasquez, usa ka balay ang hingpit nga natupok sa kalayo, gani wala’y tawo sulod sa maong panimalay tungod kay ang mga residente anaa sa trabahoan oras sa insidente.
Base sa mga testimonya, adunay mga iro nga nabilin sa balay kasna posible usab nga na lakip ka-sunog. Gipasabot usab niini nga sa pagkakaron wala pa silau mahatag nga igong detalye diin sa kasamtangan nagpadayon pa ang gihimong imbistigasyon sa hinungdan ingon man sinugdanan sa sunog.
Nanghinat usab si FSINSP Ronald Vasquez sa mga lumulopyo sa syudad, ilabi na kadtong nagpuyo sa mga digkit-digkit nga dapit, nga magpakaresponsable sa pagpanalipod sa ilang panimalay aron malikayan ang sunog nga makadaot usab sa silingan.
Gipahimangnoan niini, nga ang matag pamilya kinahanglan adunay tagsa-tagsa ka responsibilidad sa pagbantay sa kaluwasan sa balay aron walay mosangpot nga dako nga kadaot sa komunidad.
Matud pa ni Vasquez, ubay-ubay na ang natala nga sunog karong tuiga, hinungdan nga gipasiugda sa Butuan City Central Fire Station ang Fire Safety Assessment sa matag barangay ubos sa direktiba sa national office.
Dugang pa sa FSINSP, nga pinaagi sa ilang opisyal nga Facebook page, ginapublikar sa mga niini ang mga safety tips ug pahimangno, apan makita gihapon nga daghan ang wala mihatag og pagtagad niini tungod sa padayon nga pagkahitabo sa sunog.
Busa, iyang gi-awhag ang katawhan nga magtinabangay ug magmatngon sa pagbantay sa tagsa-tagsa ka panimalay aron malikayan ang kadaot ug masiguro ang kaluwasan sa komunidad.
