BUTUAN CITY- Mala-umon ang Mayor sa San Enrique, Negros Occidental nga makit-an pa nga buhi si Captain Elimar Jucal. Si Jucal mao ang kapitan sa M/V Devon Bay nga nalugdang niadtong Enero 23. Ang maong cargo ship nagkarga og 55,000 tonelada nga iron ore ug mingbyahe gikan sa Zamboanga del Norte padulong sa Guangdong, China apan nalugdang kini duol sa Scarborough Shoal.
Sa panayam sa Bombo Radyo, gipasabot ni Mayor Jilson Tubillara, nga kaila siya sa pamilya ni Jucal tungod kay kani-adto nagatrabaho kini sa City Engineers Office samtang ang amahan kanhi pulis sa Negros Occidental Police Provincial Office. Dugang pa, duha ka igsoong lalaki ni Jucal ang mga seafarer usab.
Samtang, nagpadayon ang koordinasyon sa asawa ni Jucal uban sa Philippine Coast Guard alang sa search and rescue operation. Gipasabot usab ni Tubillara nga adunay tulo ka anak si Jucal nga nag-eskwela pa ug nagpuyo ang pamilya sa Bacolod City.
Matod pa sa alkalde, dako ang iyang paglaum nga buhi pa si Jucal tungod kay adunay mga insidente sa dagat diin ang mga nawala sulod sa usa hangtod duha ka bulan nakit-an gihapon nga luwas ug maayo ang kahimtang.
