BUTUAN CITY- Padayon ang search and rescue operation sa Philippine Coast Guard alang sa upat ka missing crew members sa cargo ship nga M/V Devon Bay nga nalugdang sa Agno Bay, Pangasinan niadtong Enero 23.
Sa 21 ka tripulante, 17 ang naluwas sa China Coast Guard ug gihatag sa PCG, apan duha niini ang namatay. Ang mga nakaluwas gi-turn over na sa Department of Migrant Workers ug Bureau of Quarantine.
Sumala sa panayam sa Bombo Radyo kay Capt. Noemie Cayabyab, spokesperson sa PCG, nagpadayon ang surface ug aerial search ug radio broadcast sa mga sakayan nga molabay sa lugar aron dali mareport kung adunay masiplatan nga survivors.
Gipasabot usab ni Cayabyab nga wala pa nila gi-deklarar nga retrieval operation tungod dako pa ang posibilidad nga buhi pa ang upat nga missing.
Base sa impormasyon nga ilang nakuha, human magdeklarar ang kapitan nga i-abandona ang barko, dungan silang mibya ug nagkalapta sa dagat.
Ang upat nga wala pa makit-i mao si Captain Elimar Jucal nga taga-San Enrique, Negros Occidental, ug thirdmate Jejanfer Partosa Marfa nga taga-Cadiz City, kauban ang third engineer ug oiler sa barko.
