BUTUAN CITY-Usa ka milagro ug dakong misteryo ang pagbalik sa iring nga si Filou sa iyang mga tag-iya human sa lima ka bulan nga pagkawala ug pagbiyahe og kapin sa 250 kilometros gikan sa Espanya pauli sa Pransiya, nawala kini niadtong Agosto 2025 sa Catalonia samtang nagbakasyon ang magtiayon nga sila Patrick ug Evelyne Sire.
Bisan pa sa ilang pagpangita ug pagtaho sa awtoridad wala kini makit-i hangtod nga gidawat nalang nila ang pagkawala sa maong iring, apan niadtong Enero 9, 2026 usa ka babaye sa Homps, Pransiya ang nakakita kaniya nga niwang, gitugnaw ug gikapoy, ug nakumpirma ang iyang pagkatawo pinaagi sa microchip.
Gani, nagpabilin gihapon nga misteryo kung gi-unsa niini pagtabok sa utlanan ug pag-inusara sa taas nga biyahe, inay posibleng natabangan sa iyang spatial memory, visual landmarks ug pamilyar nga baho aron makit-an ang dalan pauli sa iyang pamilya.
