BUTUAN CITY- Nagpadayon ang tensyon sa Minneapolis human sa sunod-sunod nga insidente sa pagpamusil nga nagpalala sa kasuko sa publiko ug mipakaylap sa mga protesta.
Niadtong Miyerkules, usa ka opisyal sa federal law enforcement ang mipusil ug nakapatay sa usa ka lalaki kansa gika-ingong miikyas sa trapiko ug misulay sa pag-atake, samtang niadtong Sabado usa na usab ka residente ang namatay sa engkwentro sa mga ahente sa federal.
Ang mga panghitabo nagsunod sa pagpamusil sa 37-anyos nga si Renee Good niadtong Enero 7, kansa nagduso sa mas lawom nga kritisismo batok sa administrasyon ni Presidente Donald Trump.
Gikondenar ni Mayor Jacob Frey ang pederal nga pamalakad ug giakusahan si Vice President JD Vance nga wala’y aksyon aron mahupay ang tensyon, bisan pa nga 15,000 ka demonstrador nagpabilin nga malinawon atol sa protesta. Samtang, gipadayag ni Police Chief Brian O’Hara nga ang biktima niadtong Sabado usa ka American residence ug walay kriminal records gawas sa pipila ka tiket sa trapiko, ug adunay legal nga permit sa pagdala og pusil.
Ang Department of Homeland Security mitaho nga ang biktima nagdala og 9mm semi-automatic handgun ug misukol sa disarm attempt sa mga opisyal, nga miresulta sa pagpamusil.
