BUTUAN CITY-Mingduyog ang Police Regional Office kon PRO 13 sa nasudnong paghandom sa “National Day of Remembrance for SAF 44” pinaagi sa usa ka solemne nga seremonya karung adlawa Enero 25, alang sa pagpasidungog sa kabayanihan sa 44 ka Philippine National Police – Special Action Force kon PNP SAF troopers nga nahanaw sa Mamasapano, Maguindanao 11 ka tuig na ang minglabay.
Gisugdan ang kalihokan pinaagi sa Santos nga Misa sa may alas 7 sa buntag nga gitambongan sa mga personahe sa PRO13 ilawom sa pagdumala ni Police Brigadier General Marcial Mariano Magistrado IV, Regional director sa PRO13.
Lakip sa mga bahin sa tribute mao ang roll call sa Gallant SAF 44 Troopers, wreath-laying sa PRO13 Law Enforcement Memorial, ug Volley Fire.
Gipadala usab ni PBGEN Magistrado IV ang mensahe ni Chief PNP Police Lieutenant General Jose Melencio Nartatez Jr., kansa nagpasabot sa pagpasidungog sa kaisog, pag-ila sa sakripisyo, ug pagpanumpa pag-usab dili lamang isip mga pulis apan isip mga Pilipino.
Mitambong usab si Mr. Virgilio Inocencio, amahan sa nahanaw nga SAF member nga si SPO1 Lover Inocencio gikan sa Butuan City, uban sa ubang mga paryente.
Ang kalihokan gisalmotan sa PRO13 Command Group, Regional Staff, Provincial ug City Directors, 1st Special Action Battalion, Special Action Force, ug uban pang mga personahe sa PRO13.
