BUTUAN CITY-Anaa sa kustodiya na sa Philippine Coast Guard kon PCG ang 15 ka pinoy survivor ug ang patay’ng lawas sa 2 ka namatay nga crew members sa M/V Devon Bay human maturn-over sa Chinese Coast Guard kon CCG.
Base sa pamahayag sa PCG, nakuha ang mga pinoy crew members human ang gihimong turnover operation tali sa PCG ug CCG sa adunay gilay-on nga 168 nautical miles sa kasadpan sa Tambobong, Pangasinan.
Sumala pa sa PCG, nga nabalhin ang mga pinoy pinaagi sa rigid-hull inflatable boats tungod sa dagko nga mga balod hinungdan nga dili makaduol ang duha ka barko.
Samtang nakigkoordinar na usab ang PCG sa pamilya sa duha ka namatay aron mahatagan og husto nga haya ang mga biktima. Kasamtangang anaa sa BRP Teresa Magbanua kon MRRV-9701 ang 17 ka crew members kansa gilaomang maka-abot sa Pier 13 sa Port Area sa Manila City, ugma sa buntag, Enero 26.
Gisiguro usab sa PCG nga magpadayon gihapon ang gihimong search and rescue operation sa 4 pa nga namissing. Kataposang nakit-an ang M/V Devon cargo sa gilay-ong 262 kilometro sa kasadpang bahin sa Sabangan, Pangasinan, alas-8:30 sa gabi niadtong Huwebes karga ang iron ore padulong Guangdong China.
Samtang, mipadayag usab og pasalamat si PCG spokesperson Captain Neomie Cayabyab sa ahensya sa CCG alang sa humanitarian assistance aron masiguro ang pagmintinar sa kaluwasan sa kinabuhi sa kadagatan.
