BUTUAN CITY- Nag-atubang sa grabe nga pagbatikos ang Department of Health kon DOH human minggawas ang mga dokumentong mipakita nga ang pinakadakong alokasyon sa Medical Assistance to Indigent Patients kon MAIP sa Proposed 2026 budget napadulong lang matud pa kang Senator Bong Go.
Base sa impormasyon, nag-leak matud pa ang dokumento gikan sa opisina ni DOH Undersecretary Elmer Punzalan, diin naglatid sa mga annexes sa DOH budget ang mga MAIP allocation alang sa mga senador isip parte sa budget amendments.
Sa maong listahan, si Senador Go matud pa ang nakakuha sa pinakadakong parte sa pondo nga nagkantidad og ₱300,000,000 million, nga gisundan usab ni Senate President Tito Sotto nga adunay ₱200,000,000 million.
Ang maong probisyon direktang supak sa bag-ong palisiya sa gobyerno kansa hugot nga nagdili sa MAIP sa pagkonektar sa mga politiko. Tumong sa nasangpit nga pagdili, ang paglikay sa “patronage politics” ug masiguro nga ang tabang medikal diretso sa mga nanginahanglan nga walay bahid sa politika.
Si Senador Go iladong kaalyado ni kanhi President Rodrigo Duterte. Kahinumdumang gibutyag ni DOH Undersecretary Albert Domingo nga ang pondo sa MAIP kinahanglang i-download sa mga hospital nga gipadagan sa local government.
Samtang, wala pa minhatag og pamahayag ang Department of Health (DOH) kalabot sa nasangpit nga isyu ingon man ang opisina ni Senator Bong Go.
