BUTUAN CITY – Mi-abot sa 1,500 ka mga sundalo nga gi-andam sa Pentagon aron posibleng ipakaylap sa Minnesota, partikular sa siyudad sa Minneapolis, tungod sa nagkagrabe nga protesta batok sa operasyon sa Immigration and Customs Enforcement (ICE) human sa pagpusil-patay sa usa ka babaye sa kamot sa usa ka ICE agent sa mi-aging mga semana.
Sumala sa report, ang mga sundalo gikan sa 11th Airborne Division sa Alaska ug gibutang sa status nga “prepare‑to‑deploy” kung manduan sila sa US President Donald Trump nga ipakatag na aron suportahan ang pwersang pederal.
Wala pa’y klaro kung kanus-a ang deployment sa maong mga sundalo.
Ang pagtaas sa tensiyon sa lugar tungod sa lapad nga protesta ug pagtupak sa mga lokal nga lider, lakip na ang mayor sa Minneapolis, nga nag-ingon nga ang pagdala og sundalo alang sa ingon ani nga sitwasyon, supak sa konstitusyon ug makapagrabe pa sa tensyon.
