BUTUAN CITY- Mingresulta og dakong kalihokan ang Bagyong Ada sa Barangay Los Angeles, Butuan City human sa kusog nga pagbaha niadtong miaging adlaw kansa nakaapekto sa daghang residente sa Purok 11, 12, 9, 8, 15 ug 7, gani karun nagpabilin na nga maayo ang panahon.
Sumala ni Los Angeles Barangay Kagawad Oscar Camarines, nga daghang pamilya ang napugos nga mamakwit tungod sa kalalum sa tubig, apan kagahapong adlawng minghimo og koordinasyon ang mga opisyales sa barangay uban sa City Disaster Risk Reduction and Management Office kon CDRRMO aron masiguro ang organisadong pagresponde sa kalamidad.
Gibutyag usab niini, nga tanang opisyales sa barangay gihatagan og tagsa-tagsa ka responisibildad aron nga dili mahimong alanganin ang pag responde sa mga katawhan, gani ang maong sistema dugay nang gipatuman sa barangay tungod kasagaran bahaon ang lugar matag adunay kusog nga nga pag-ulan o bagyo, ug gipahimangnoan na daan ang mga residente sa angay nga buhaton ilabi na sa gabii ug kung adunay mga tigulang nga lisud iluwas sa delikadong kahimtang.
Dugang pa sa Barangay Kgawad, nga ang Agay Bridge maoy nakapahatag og delikado sa kadalanan tungod diha matud pa ang exit sa usa ka falls nga naghatod og kalalum sa tubig ugaling adunay kusog nga pag-ulan.
Gipasi-ugad usab niini, nga ang mga opisyal sa barangay mipadala na og sulat ngadto sa Department of Public Works and Highways kon DPWH aron ipahimangno nga kinahanglan na nga i-elevate ang maong tulay.
Gani matud pa ni Camarines, nga plano na nilang maghimo og joint session kauban ang Barangay Los Angeles, Baobaowan, Santo Niño ug Panaytayon aron maghiusa sa paghangyo sa national government nga magpatuman og flood control project ug pagtas-an ang tulay, tungod kay kini nga mga lugar mao ang pirmi maapektuhan sa pagbaha.
