BUTUAN CITY- Nakadawat ang 160 ka stranded passengers og Ready-to-Eat Food (RTEF) packs gikan sa Department of Social Welfare and Development (DSWD) Field Office Caraga human ang Tropical Depression Ada misaka ngadto sa Tropical Storm Ada nga hinungdan sa pagsuspenso sa biyahe sa dagat ug pagkapundo sa daghang pasahero sa Surigao City ports.
Sa maong gidaghanon, 128 ang gikan sa Lipata Port ug 32 gikan sa Eva Macapagal Port. Ang RTEF usa ka pagkaon nga praktikal ug dali kay dili na kini kinahanglan lutoon ug pwede dayon makonsumo.
Ang matag pack naglangkob og lima ka lata sa tuna paella, tulo ka pack sa champorado, duha ka pack sa chicken arroz caldo, duha ka high-protein bars, usa ka sachet sa complementary food, usa ka lata sa chicken pastil, ug usa ka lata sa chicken giniling.
Nagpabilin nga alerto ug andam ang DSWD Field Office Caraga sa pagresponde samtang nagpadayon ang sitwasyon, aron masiguro nga walay mabiyaan.
