BUTUAN CITY – Natapos na sa House of Representatives ang deliberasyon ug sponsorship sa nagkalain-laing ahensya sa gobyerno alang sa 2026 National Budget kansa gisugdan niadtong Septembre 22.
Pasado alas-12 kaganinang tungang gabie, nahuman ang deliberasyon diin katapusang gisusi ang pondo alang sa special purpose fund o lumpsum funds sa tuig 2026. Migkabat sa P6.793-trillion ang kinatibuk-ang kantidad sa national budget proposal alang sa sunod nga tuig. Gitakda usab ang period of amendments alang sa House Bill 4058 kon ang 2026 General Appropriations Bill (GAB) karong Oktubre 10 ug target sa Kamara nga mapapasar sa ikatulo ug katapusang pagbasa ang GAB sa Oktubre 13.
Highlight sa maong budget ang ₱255 billion nga gi-reallocate gikan sa budget sa Department of Public Works and Highways, ilabina sa mga kontrobersyal nga flood control projects ngadto sa pagsaka sa budget sa ubang ahensya. Lakip na niini ang ₱32 billion alang sa Assistance to Individuals in Crisis Situations (AICS) sa Department of Social Welfare and Development kon DSWD; ₱22.5 billion alang sa Basic Education Facilities sa Department of Education; ₱6.6 billion para sa Tertiary Education Subsidy sa Commission on Higher Education; ingon man ang ₱7.4 billion alang sa Commission on Elections nga gamiton sa 2026 barangay ug SK elections.
Lakip sa katapusang gimando atol sa maong session ang pagtangtang kang kanhi Representative Elizaldy “Zaldy” Co gikan sa mga katungdanan niini sa Kongreso human sa iyang resignation.
