BUTUAN CITY – Subling gipasanginlan sa civil group nga Bangon Sambayanan si Pangulong Ferdinand Bongbong Marcos Jr. ingon man ang ig-agaw niining si Martin Romualdez nga mao matud pa’y utok sa nahitabong kurapsyon sa nasod.
Sumala ni Jeffrey ‘Ka Eric’ Celiz, secretary general sa maong grupo, sila ang nag-unang hinungdan sa gipahigayong mga rally. Apan dakong kadismaya lamang niini tungod kay wala gipanawagan sa mga nagrali ilabina sa simbahang katoliko nga mokanaug si Presidente Marcos, tungod kay nasayod matud pa sila nga kung mokanaug si Marcos, si Vice President Sara man ang mopuli nga delikado sa ilang existence.
Tambag usab ni Celiz kang Malacanang Palace Press Officer Claire Castro, mas maayo kung magpakahilom na lang kini ilabina kung kaugalingon man lang gani niining opinyon ang iyang mga gipangsulti sa media, tungod kay mas makapasuko pa kini pagsamot sa mga tawo.
Kahinumdumang gibutyag ni Castro nga dili lung-an sa Malacanang ang mga nag-organisa sa kagubot sa nahitabong rally dayong butyag nga mahimo pang inciting to sedition ang pamahayag ni kanhi Ilocos Sur Governor Luis Chavit Singson nga kinahanglang ang kabatan-unan ang manguna sa rebulosyon.
