BUTUAN CITY – Ipadayon karong adlawa sa mga rescuers ang search and retrieval operations alang sa nahibilin nga tulo ka tawo nga na-missing human natabunan sa mga dagkong bato ug lapok ning mi-aging gabii sa Purok 1, Brgy. Mahayahay, lungsod sa San Luis, Agusan del Sur.
Kini human gihunong kagahapon sa alas-dos sa hapon ang operasyon tungod sa subling pag-uwan nga hulga sa kaluwasan sa mga rescuers tungod sa posibilidad nga subling mag-landslide tungod kay basa pa kaayo ang yuta sa kabukiran sa maong lugar hatud sa pila ka adlaw nga pag-uwan.
Sumala ni Alexis Cabardo, information officer sa Agusan del Sur Provincial Disaster Risk Reduction and Management Office, nakaplagan gahapon ang ikatulo sa unom ka mga missing nga na-ilang si Gerry Abunda, lolo sa una nang nakaplagang patay nga si John Paul Abunda, 3-anyos; ug ang usa pa nga na-recover, nailang si Junard Gonzales, ang driver sa Saddam truck.
Samtang ipadayon pa ang pagpangita nila Helen Abunda, 62-anyos, usa pa ka Saddam truck driver nga si Elwin Mantibalan, ug ang driver sa motorsiklo nga si Macjoe Nuer. Gahapon gisusi na sa mga engineers ang kahimtang sa kabukiran aron masayran kung luwas ba ang pagpadayon sa operasyon karong adlawa.
