BUTUAN CITY – Gi-awhag sa mga prosecutors sa International Criminal Court (ICC) ang mga huwis nga dili ihatag ang hangyo ni kanhi Presidente Rodrigo Duterte nga i-postpone ang pagtaral sa iyang kaso tungod kay dili matud pa igo, ang rasong wala nay madumduman si Duterte, tungod sa iyang cognitive impairment.
Sa gisang-at nga dokumento niadtong Setyembre 11, gibutyag sa ICC Office of the Prosecutor nga dili igo ang taho sa defense team ni Duterte aron hunungon na ang proseso.
Plano usab sa prosekusyon nga mokuha og kaugalingon nilang medical expert aron sukdon ang kakapas ni Duterte nga mu-atubang sa pagtaral. Dugang niini, ang pagka “fit to stand trial,” wala gibase sa sakit sa akusado kundili sa kakapas niining sabton ang gisang-at nga kaso batok kaniya, susihon ang ebidensiya, ug hatagan og direksyon ang iyang abogado.
Giklaro usab sa prosekusyon nga kinahanglang limitado lamang ang pag-postpone sa nasangpit nga pagtaral ug kini, alang lamang sa medikal nga pagsusi. Gusto sa prosekusyon nga makumpleto na ang confirmation of charges hearing adiser matapos kining tuiga.
Una nang giklaro sa abugado sa kanhi presidente nga si Nicholas Kaufman, dili na madumduman ni Duterte ang mga importanteng impormasyon, apil ang mga tawong suod kaniya. Subay sa taho sa defense medical expert, lakip ang usa ka neuropsychologist sa ICC, dili matud pa kayang mulambigit ni Duterte sa bisan-unsang legal nga pagdungog.
