BUTUAN CITY – Nakuhaan og usa ka gramo sa suspected shabu ang usa ka street level individual nga gibana-banang nagkantidad og ₱6,800 sa gilusad nga drug buy-bust operation pasado alas-3:52 kagabii sa Purok 1, Brgy Ampayon ning siyudad sa Butuan.
Misangpot kini sa pagkasikop ni alyas Win-win, 34-anyos, ulitawo ug residente sa susamang lugar.
Nakuha sa mga sakop sa Butuan City Police Station kon BCPS-4 Drug Enforcement Unit uban sa Philippine Drug Enforcement Agency kon PDEA-Caraga ang usa ka transparent plastic sachet nga duna’y sulod nga suspected shabu isip buy-bust item; apil na ang gikuptan niyang laing sachet sa susamang epektos ingon man ₱500 nga marked money.
Gikostudiya na sa BCPS-4 ang dinakpan ug ang nakuhang ebidensya alang sa tukmang disposisyon.
Nasuta pa nga gihimong suyupanan ang gipuy-an sa suspetsado human nakapaskil sa sulod nga mubayad og ₱20 ang muplastar sa sulod.
