BUTUAN CITY – Misaka na sa 34 ang patay sa lapad ug dugoong protesta sa Nepal base na sa pagkumpirma ni Bombo International Correspondent Marivic Alonzo Gurung kondiin lakip sa mga nangamatay, mga sibilyan ug mga pulis. Kahinumduman nga ning-ulbo ang protesta sa maong nasod pinaagi sa mga batan-ong demonstrador nga nag-rally batok sa kurapsyon sa maong nasod, ingon man pag-ban sa ilang mga magbabalaod sa social media.
Sa kasamtangan, malinawon na ang ilang nasud tungod sa pagpatuman og curfew sa kasundaluhan gikan sa buntag ngadto na sa alas-singko sa hapon alang sa kaluwasan sa mga residente. Apan bisan og malinawon na ang maong nasod tungod sa curfew, padayon pa gihapong gipangita ang gibana-banang 16-mil ka mga pinirisong naka-ikyas gikan sa bilanguan.
Dugang ni Gurung, duna matud pay mga high profile inmates nga nang-ikyas, apan duna usay uban nga mas gipili ang dili pag gawas sa bilangguan alang sa ilang siguridad. Sumala niini, gipangunahan ang nasangpit nga protesta sa mga Generation Z kon GEN-Z nga nag-edad og 13 ngadto sa 27 anyos.
Gigamit sa mga demonstrador ang dili sikat nga mga social media application nga wala pa gi-ban sa ilang nasod sama sa reddit, ug Virtual private network kon VPN arun makasulod sa mga social media, ug masabutan ang protesta.
Kini usab ang rason nga wala makabantay ang kadaghanang mga opisyal sa pangamhanan nga dunay dakong rally nga mahitabo. Sa kasamtangan, walay mga Pilipino nga nadamay ug nangapil sa maong kagubot.
