BUTUAN CITY – Dili moubos sa 14 ka mga indibidwal ang patay ug kapin dosena na usab ang na-angul tungod sa lihok protesta sa mga demonstrador sa Kathmandu, Nepal, tungod sa desisyon sa pangamhanan nga ibawal sa nasangpit nga nasod ang 26 ka mga social media platforms sama sa Facebook, X , ug YouTube.
Tungod niini, gisulong sa mga raliyista ang parliamento ug gisulayan pa kini og sulod, diin dere na migamit ang mga pulis og pusil, rason nga nanga-angul ug nangamatay pa ang uban niini.
Una nang gipanawagan sa pipila ka grupo nga undangon na sa pangamhanan ang social media ban ingon man kurapsyon sa nasangpit nga nasod. Dugang niini, migamit usab ang mga kapulisan og water cannon ingon man teargas.
Tungod niini, nagpatuman na og curfew sa palibot nga mga lungsod sa presidential house ug sa parlyamento, arun mapugngan matud pa ang kagutbot. Sumala sa mga otoridad, rally matud pa kini sa mga “Gen Z” o kadtung mga natawo sa tuig tali 1995 ug 2010.
Sumala pa nga nag-uagt ang pag ban sa mga social media sa maong nasod tungod sa makapila na kining gimanduan sa pangamhanan nga magparehistro, apan gibalewala lamang kini. Lakip sa mga nagpabilin lamang nga magamit sa maong nasod ang TikTok ug Viber.
