BUTUAN CITY – Pangunahan na ni Senate President Pro Tempore Ping Lacson ang imbestigasyon sa Senate Blue Ribbon Committee kalabot sa mga anomalosong proyekto sa flood control projects sa nasod.
Kini human gikumperma ni Senate President Vicente Sotto III nga si Lacson ang mohulip kang Senador Rodante Marcoleta isip chairman sa nasangpit ng komite. Pasabot ni Sotto, dili sakop sa majority bloc si Marcoleta, ug ang Blue Ribbon Committee gitagana lamang sa mayoriya ug wala usab matud pa’y patakaran nga kinahanglang abogado ang molingkod isip chairman sa Blue Ribbon Committee.
Gihimo pang panag-ingnan sa Senador ang pagkapili ni Senador Sonny Alvarez sa 9th Congress isip chairman sa Blue Ribbon Committee bisan og dili kini abogado ilabina nga ang pagka-abogado dili matud pa garantiya sa pagka-maayo nga imbestigador. Samtang magpabilin si Senador Sherwin Gatchalian isip chairman sa Committee on Finance, nga maoy mangulo sa pagrepaso sa proposed national budget alang sa 2026.
Gitudlo usab si Senador Panfilo ‘Ping’ Lacson isip Senate President Pro-Tempore, samtang si Senador Juan Miguel Zubiri maoy majority leader ug si Senador Risa Hontiveros mi-abin na sa bag-ong majority samtang anaa na usab karon sa minority bloc sila Senador Chiz Escudero, Ronald ‘Bato’ de la Rosa, Robin Padilla, Bong Go ug Imee Marcos.
