BUTUAN CITY – Suportado ni Bise Presidente Sara Duterte ang mando ni Presidente Ferdinand “Bongbong” Marcos Jr. nga ipailawom sa lifestyle check ang tanang opisyal sa gobyerno. Kini isip kabahin sa imbestigasyon sa mga anomaliya sa mga flood control projects.
Apan sigon ni VP Sara, kinahanglang dili lang kini himuon sa mga elected officials kondili apil na usab sa mga tinudlong opisyal.
Importante matud pa nga repasohon pag-ayo sa gobyerno ang sulod sa Statement of Assets and Liabilities Network kon SALN sa usa ka opisyal, diin kinahanglang ipagawas ang mga dummies sa mga opisyal sa publiko.
Ang pamahayag ni Vice President Sara Duterte.
Sa pikas bahin Andam si Department of Public Works and Highways (DPWH) Secretary Manuel Bonoan nga mupakita sa iyang Statement of Assets, Liabilities, and Net Worth (SALN).
Kini ang tubag sa kalihim sa mando ni Presidente Ferdinand Marcos Jr. nga himooon ang lifestyle check sa tanang opisyal sa gobyerno. Nasayrang duna’y bag-ong Anti-Corruption Task Force sa DPWH nga nag-awhag sa publiko sa pagtaho sa mga kwestyonableng proyekto sa DPWH ngadto kanila.
Masaligon usab ang kalihim nga dako gihapon ang pagsalig kaniya sa Presidente tungod kay gimanduan man kini nga paspasan ang imbestigasyon sa mga anomalosong flood control projects. Gusto usab sa kalihim nga manubag ang tanang nalambigit sa mga maong mga anomaliya.
