BUTUAN CITY – Gikalipay sa civil society group nga Sara All Movement ang pagka-relieve ni kanhi Philippine National Police Chief PGen. Nicolas Torre III kagahapong adlawa.
Sumala sa Secretary General sa maong grupo nga si Engr. Dioric Gavino, malipayon silang usa ka PMA-yer nga dunay dignidad ang gihulip kang Torre tungod kay mabalik na man unya ang pagsalig sa katawhan ngadto sa Philippine National Police.
Lantaw ni Gavino, ang pagbuot-buot matud pa ni Torre pag-reshuffle sa mga opisyal sa PNP ang hinungdan sa iyang pagkatangtang sa pwesto human gi-assign ni Torre si Police Lt. Gen. Jose Melencio Nartatez Jr. isip Area Police Commander for Western Mindanao gikan sa pagka Deputy Chief for Administration niini.
Anaa pa ang pagbalik kang Lt. Gen. Bernard Banac sa kanhi niining katungdanan ingon man sa lain pang 11 ka mga tag-as nga opisyal sa han-ay sa kapulisan. Apan niadtung Agusto 14, nagpagawas ang National Police Commission og resolution kansa nagbali sa desisyon ni Torre.
Nasayrang mga ubos nga opisyal lamang sa PNP ang mahimong ibalhin sa PNP Chief, kansa kinahanglan gihapong duna’y pagtugot sa National Police Commission kon NAPOLCOM — ang oversight body sa PNP.
Nagtoo usab si Jeffrey Celiz, secretary sa civil society group nga SAMBAYANAN nga mas maayo pa alang kang Torre nga mag-early retire na lang kini kaysa mabutang kini sa floating status sulod sa pito ka bulan, hangtud sa Marso, 2026 kansa mao ang iyang mandatory retirement age.
Sumala ni Celiz, mas dili pa ulaw alang sa kanhi PNP Chief ang maong opsyon, ilabina nga daw gipaka-ulawan kini human wala man lang giyagyag kaniya ang nasangpit nga mga opsyon, ug daw nalargo ra og katangtang sa pwesto.
Dugang pa ni Celiz, isog matud pa nga mensahe ang gipa-abot sa Malacañang kagahapong adlawa nga kinahanglang hinumduman nga duna pay mas labaw kang Torre sa posisyon, ug kini mao si Department of Interior and Local Government (DILG) Secretary Juanito ‘Jonvic’ Remulla ug ang appointing official niining si Pangulong Ferdinand Marcos Jr.
