BUTUAN CITY – Padayong gi-awhag sa Philippine Health Insurance Corporation kon PhilHealth-Caraga ang mga lokal nga Parmasya nga magpasa sa ilahang letter of intent ngadto sa ilahang buhatan arun mamahimong supplier sa mga listahan sa tambal alang sa PhilHealth Guaranteed and Accessible Medications for Outpatient Treatment kon GAMOT program.
Sigon ni Dr Reinerio Durano Jr., medical specialist IV sa PhilHealth-Caraga, ubos niini nga programa, ang mga tambal na ang gi-cover kansa makuha sa mga parmasya sukwahi niadtong wala pa ang programa nga sa ospital makuha ang mga tambal.
Ubos sa maong programa, ang matag-membro sa ilang ahensya, gigahinan og hangtud sa ₱20,000 nga balor sa free outpatient medicines matag-tuig.
Cover niini ang 75 ka mga essential medicines, apil na kadtong mga tambal alang sa hypertension ug heart disease, diabetes, asthma ug Chronic Obstructive Pulmonary Disease kon COPD, high cholesterol, infections ug mga nervous system disorders.
Wala matud pay angayang ika-balaka ang maong mga parmasya tungod kay digital man ang nasangpit nga programa, diin duna lamay application nga kinahanglan nilang i-download.
Sa kasamtangan, wala pay mga providers ang ahensya sa nasangpit nga programa.
Pagklaro sa doktor, dili kini lugi alang sa mga gustong mo avail isip provider sanglit tanang mga Pilipino man ang mamahimo nilang costumer, sanglit ang tanan man usab, membro sa Universal Healthcare.
