BUTUAN CITY – Mogamit ang Pilipinas og tukmang kusog human sa mga namataang presensya sa China sa West Philippine Sea ning mga nakalabayng adlaw, kini subay na sa pamahayag ni Armed Forces of the Philippines (AFP) Chief of Staff Gen. Romeo S. Brawner Jr. mahitungod sa mga naglawig nga mga barko nga iya sa China sa Ayungin Shoal ingon man sa mga pagsulay og dool sa mga rubber boats sa China sa BRP Sierra Madre.
Sumala sa opisyal, padayon nilang gamiton ang Rules of Engagement ilabi na karon nga dili nalang basta barko sa China ang nagalawig sa kadagatan sa Pilipinas, kundili duna na usab kini dala nga mga armas. Gipaniguro usab ni Brawner nga kanunayng andam ang armadong kusog sa Pilipinas sa bisan unsang ‘evantuality’ nga mahitabo unya sa West Philippine Sea.
Kahinumdumang naobserbahan sa maritime domain awareness (MDA) monitoring sa Armed Forces of the Philippines (AFP) ang pagdaghan sa presensiya sa mga barko sa China sa bisinidad sa Ayungin Shoal niadtung Miyerkules, Agosto 20, diin ang uban sa mga gibuhian niining mga rigid-hulled inflatable boats ug mga fast boats kay dunay dala nga mga armas.
Mingbuhi usab og halang nga mga pulong si Department of National Defense (DND) Secretary Gilberto “Gibo” Teodoro batok sa China nga padayong nagpakatap og propaganda sa social media platforms mahitungod sa pagsulod niini sa kadagatan sa Pilipinas.
Nagsumikad usab ang nasangpit nga pamahayag human gi-barred sa China si senator Francis Tolentino sa teritoryo niini tungod sa lig-on niining baruganan sa nasangpit nga issue.
Subay sa maong pamahayag, mas gipalig-on pa ni Teodoro ang baruganan sa Pilipinas ilabi na sa Philippine Maritime Zones Act and the Archipelagic Sea Lanes Act.
