BUTUAN CITY – Nanawagan ang grupong Mayors for Good Governance kang Pangulong Ferdinand Marcos Jr. nga panganlan ang mga hwing politiko ug mga kontratista nga nagpaluyo sa mga palpak nga proyekto sa imprastruktura, partikular na sa flood control projects.
Sumala sa maong grupo, nga gilangkuban nila Baguio City Mayor Benjamin Magalong, Pasig City Mayor Vico Sotto, Quezon Mayor Joy Belmonte ug Isabela City Mayor Sitti Hataman, dugay nang ang nasangpit nga kurapsyon sa maong mga proyekto, busa kinahanglan nang patubagon ang mga nalambigit niini.
Nakalatid sa sulat nga ilang gipa-abot sa presidente, nga kinahanglan matud pang atubangon sa maong mga indibidwal ang tibook gahum sa balaod, ug ugaling masakpan, kinahanglang tangtangon kini sa pwesto ug i-prosecute pa arun mapriso.
Gipangayo usab sa maong grupo ngadto sa Department of Public Works and Highways (DPWH) ug uban pang ahensya sa Pilipinas nga ipagawas ang mga dokumento ug pangalan sa mga politiko ug kontratistang nagpahimulos sa kapin sien bilyones pisos nga pondo, kansa gisapupo lamang sa 15 ka mga kontratista sukad niadtung 2022 ngadto sa 2025.
Nag-ugat ang maong panawagan sa kabalaka ni Pangulong Marcos sa kalidad sa mga proyekto, sama sa mga nangagubang flood barrier sa Calumpit, Bulacan, diin dismayado kini.
Samtang, gikataho usab ni Mayor Magalong nga andam kining mag-volunteer nga mahimong kabahin sa independent body basta lang kay isalig kaniya ang pagpili sa mga imbestigador nga mamahimong kabahin sa maong grupo.
