BUTUAN CITY – Dakong pasalamat ni Agusan del Norte provincial jail warden Fermin Antenorio sa Bombo Radyo Butuan, human malampusong nasikop ug nadala pagbalik sa Agusan del Norte Provincial Jail ang naka-eskapo nilang usa ka person deprived of liberty.
Sumala niini, dakong tabang ang sibyahan sa subling pagkasikop ni Charlie Adlawon Rafael kinsa misibat gikan sa Agusan del Norte Provincial Jail niadtong Agusto 5, sa bandang alas 5 ang takna sa hapon.
Sigon sa opisyal, wala magpakita og pagsukol si Rafael dihang gipahibalo siya nga subli siyang dakpon kondiin daw drama pa sa telebisyon ang senaryo tungod kay natuman man ang bugtong pangandoy lang sa maong eskapo nga makita ang iyang anak, human nga ila kining gidala ngadto kaniya gikan sa igsoon niining maoy nag-atiman sa bata.
Grabeng gakus og hilak ni Rafael dihang nakita ang iyang 6-anyos nga anak nga ila pang gi-uban hangtud sa provincial jail, base na usab sa hangyo sa maong piniriso kondiin gi-isolate sila aron maka-uban niini sa pagkatulog.
Tungod sa pagsibat ni Rafael, duna na’y limitasyon ug reservation sa pagtagad nga una nang gihatag kaniya tungod kay dili na siya mahimong trustee.
