BUTUAN CITY –Gina-review pa sa mga otoridad ang final report sa imbestigasyon sa nahitabong pinusilay nga miresulta sa pagkamatay sa usa ka pulis ug usa ka job order employee sa Land Transportation Office kon LTO, pasado alas-3:35 sa kaadlawon kagahapon sa Brgy. Sta. Cruz, San Jose City, Dinagat Islands.
Ang napatay nga pulis mao si Patrolman Ferry Sida Jaso, 29 anyos, minyo, taga-Maainit, Surigao del Norte, ug naka-assign sa CIDG-Dinagat Islands.
Patay usab si Anjun Casador, taga-Purok 1, Brgy. Sta. Cruz, San Jose, Dinagat Islands, usa ka job order employee sa lokal nga gobyerno nga naka-detail sa LTO-Dinagat Islands.
Sumala ni PCapt. Calvin Placer Jr., naghimo og surveillance ang CIDG-Dinagat gumikan kay nalambigit matud pa si Casador sa illegal nga kalihukan ug nagadala og armas human sa trabaho.
Pag-abot nila sa lugar, kalit gipusil ni Casador sa ulo si Patrolman Jaso nga napatay diha-diha gilayon rason nga dali usab nga gipusil ni Patrolman Leonel Estroso, si Casador sa kapito ka higayon hinungdan sa iyang kamatayon.
Dugang ni Capt. Placer, bag-o pa lang gi-assign si Estroso sa lugar gikan sa Cavite, mao nga wala siya mailhi ni Casador ug wala gipusil.
