BUTUAN CITY- Ping-it gihapon ang katawhan sa Surigao City sa kakulang sa supply sa tubig gikan sa PrimeWater Surigao Metro sama sa nasinatian sa ubang mga kunsumidor niini sa ubang mga dapit sa nasud.
Sumala ni Benjie Ballaran, konsumidor sa Surigao Metropolitan Water District kon SMWD, palpak ang Joint Venture Agreement kon JVA tali sa Prime Water ug sa maong water district nga naglatid sa ilang kooperasyon sa paghatag og water services sa maong siyudad.
Dugang ni Ballaran nga taliwala sa kakulang ug kahinay sa ilahang tubig, dako gihapon ang singil kanila nga anaa sa 300 pisos ang minimum. Una nang gipasamot ang maong problema sa isyu sa Illegal mining ug deforestation sa Parang-Parang Watershed, ang main source sa tubig sa maong siyudad.
Mas misamot kini dihang nasuta nga walay nahimong long term solution ang SMWD sa maong problema rason nga daw nawala ang nature sa ilang partnership ilabina nga ang saad sa PrimeWater nga mga-invest og 800-milyunes pisos, wala matuman. Gikumpirma na matud pa ni SMWD General Manager Benjamin Ensomo nga ang tubig sa Parang-Parang Watershed, pahubas na rason nga nagduso na kini og pre-termination letter ngadto sa PrimeWater alang sa hingpit nang pag-terminate sa ilang kontrata.
Ang pamahayag ni Benjie Ballaran, residente sa Surigao City ug konsumidor sa Surigao Metropolitan Water District.
