BUTUAN CITY – Naka-abot na sa India si Pangulong Ferdinand Marcos Jr. alang sa lima ka adlaw niining state visit sa maong nasod. Mitugpa ang gisakyan niining eroplano sa Indira Gandhi International Airport sa New Delhi kagahapon sa hapon kauban si First Lady Liza Araneta-Marcos ug ang delegasyon niini, gisugat sila sa mga kadagkuan sa India ug gidalitan pa og tradisyunal Indian dance.
Nakigpulong gilayon ang pangulo kang Indian External Affairs Minister Dr. S. Jaishankar pinaagi sa courtesy call. Sa iyang pag-atubang sa Filipino community nga gitambungan sa gibana-banang 200 ka mga Pinoy, gipadayag niini nga kanunay’ng tinguha sa kagamhanan sa matag-state visit ang kaayuhan sa katawhang Filipino, masulod man o gawas sa Pilipinas.
Gipahibalo usab niini ang dili mu-ubos sa unom ka mga accords nga iyang pirmahan, apil sa law, culture, science & technology, ug posibleng maritime cooperation. Anaa usab ang mas barato nga medisina, mas lig-on nga connectivity ug food security alang sa mga Pilipino. Giahtagan usab og visa-free entry ang mga Indian tourists aron mapalambo ang turismo sa Pilipinas.
Ang tipik lang sa pamahayag ni Presidente Marcos atubangan sa Filipino community sa among nasod.
Lauman usab nga makigkita si Pangulong Bongbong Marcos karong adlawa kang Indian President Droupadi Murmu. Duna usay naka eskedyul nga bilateral meeting kauban si Indian Prime Minister Narendra Modi diin hisgutan sa duha ang hugot nga relasyon sa India ug Pilipinas.
