BUTUAN CITY – Nagtoo si Vice President Sara Duterte nga nakigkunsabo ang administrasyon ni Pangulong Ferdinand Marcos Jr. sa International Criminal Court (ICC) aron ipadakop ang iyang amahang si kanhi Pangulong Rodrigo Duterte.
Kini kalabot na sa mga kaso niining gi-atubang nga crimes against humanity kansa may kalambigitan sa ‘war on drugs’ niadtung siya pa ang presidente sa Pilipinas ug mayor sa dakbayan sa Davao. Sumala sa Bise Presidente sa Free Duterte Now rally sa The Hague, dunay politikal motives nga magpaluyo sa pagpa-aresto sa iyahang amahan niadtung Marso 11 ning tuiga.
Nagkasabot matud pa si Presidente Marcos Jr. ingon man ang ICC aron papason sa eksena ang kanhi Presidente nga usa sa pinaka-vocal nga kritiko sa administrasyong Marcos. Kamatu-uran matud pa niini ang kawala’y igong rason sa pagpapriso sa iyang amahan sa Scheveningen Prison sa The Hague ug base lamang matud pa sa mga tsismis ang akusasyon kabahin sa extrajudicial killings (EJK).
Klaro matud pa nga nanghilabot na ang ICC sa kaugalingong pamalakad sa Pilipinas, ug duna kini kaugalingong “agenda” aron mahawiran pa gihapon ang suporta ug pondo gikan sa ubang mga nasod.
Ang pamahayag ni Vice President Sara Duterte.
Subay niini, wala na usab ning hatag og komento pa si ICC spokesperson Fadi El Abdallah mahitungod sa mga gipamulong sa bise Presidente, ug gipamugos nga ang ICC, usa ka judicial institution ug kinahanglang sa korte iduol ang tanang legal nga mga isyu. Padayon usab ang panawagan sa Bise Presidente nga iuli na sa Pilipinas ang iyahang amahan.
