BUTUAN CITY – Arestado na ang lain pang suspek sa pagpatay sa 19 anyos nga estudyante sa Tagum City nga si Sophia Marie Coquilla.
Naila ang dinakpan nga si alyas Yan-yan, 15 anyos ang pangidaron.
Pasado alas 10 matud pa kagabie, Hulyo 10, dihang naabtan ang suspek sa mga sakop sa Tagum City PNP sa giabangang boarding house asa nadakpan ang duha pa ka mga kaubanan niini.
Hinoon, aminado matud pa si alyas Yan-yan nga lakip siya sa 4 ka mga suspek nga misulod sa balay sa pamilya Coquilla.
Sa karon,usa na lang ang nagpabiling gawasnon ug padayong ginapangita sa mga otoridad.
Nasayrang sulod-guwa na sa prisohan ang mga suspek ug daan na kining nalambigit sa pagpanglungkab dihang namuyo pa kini sa Maragusan, Davao de Oro ug namalhin sa Tagum.
KAMATAYON NI SOPHIA
Kahinumdumang nakahi-agom ang biktima og 38 ka mga samad sa nagkadaiyang bahin sa kalawasan nga hinungdan sa kamatayon niini human nga gikawatan sulod sa iyahang kwarto.
Sumala sa report sa kapulisan, patay nang napalgan ang biktima sulod sa kwarto niini sa Purok 3-A, La Filipina, Tagum City, Davao del Norte kagahapon sa buntag.
Sayrang si Sophia, mosulod na untana isip koliheyo karong abli sa klase sa UP Manila.
Subay sa inisyal nga imbestigasyon, naabtan na lamang sa ginikanan nga wala nay kinabuhi ang biktima ug naligo sa kaugalingon niining dugo.
Sumala pa sa kapulisan, gisulod sa mga suspetsado ang kwarto sa biktima ug gipatay gamit ang kutsilyo ug uban pang mga gahi nga butang nga narekober sa crime scene. Samtang nahanaw usab ang personal niining mga gamit sama sa laptop, relo ug uban pa sulod sa kwarto.
Sa laing bahin, sikop gilayon ang duha sa upat ka mga suspetsado human sa hot pusuit operation. Sumala pa sa Tagum PNP, adunay nihatag kanila og impormasyon kabahin sa pag-ila sa mga suspetsado human nga nakuhaan kini og CCTV footage human sa nahitabong krimen. Narekober na usab ang mga gamit sa biktima nga anaa sa boarding house sa mga suspek.
Sa pagkakaron, gitugyan na ang mga menor edad nga suspetsado sa Women and Children Protection desk kon WCPD. Sumala pa sa kapulisan, robbery with homicide ang motibo sa krimen.
Nasayran nga pag-umangkon ang biktima sa kasamtangan nga konsehal sa dakbayan sa Tagum na si Engr. Jun Coquilla.
