BUTUAN CITY – Gibanhaw ni Senador Joel Villanueva ang sugyot-balaodnon niining Anti-Endo Bill, kansa nagtumong nga taposon ang kontraktwalisasyon sa mga mamumoo sa nasud.
Gitawag ang maong sugyot nga Security of Tenure and End of Endo (end of contract) bill, diin sumala sa Senador nga kini ang ihayang prayoridad sa pagbukas sa 20th Congress niadtong Hunyo 30,2025.
Tumong sa maong balaudnon ang pag-amendar sa pipila ka probisyon sa Labor Code aron mas maklaro ang pagbawal sa “labor-only contracting (LOC)”.
Sumala ni Villanueva nga dugay na matud pang gihangyo sa mga mamumoong Pilipino ang pagtanggal sa kontraktwalisasyon. Dugang niini nga hatagan matud pa sa maong balaodnon ang industry tripartite councils og gahom sa pagdeterminar sa mga trabaho nga direktang may kalabotan sa nag-unang negosyo sa usa ka contractee o principal.
Panghinaot sa senador nga suportahan siya sa iyang mga kaubang magbabalaod ug sa Malacañang sa iyang balaudnon nga gisugyot alang sa dinalian nga pagpasar niini.
