BUTUAN CITY – Ubay-ubay na nga mga kaso sa online sexual abuse sa kabataan ang gikuptan karon sa Regional Anti-Crime Unit kon RACU-13 dinhi sa Caraga Region kondiin ang mga batang biktima, nakahatag kanila og mga sensitibong imahe sa mga tawong ilang naka-istorya online.
Sa eksklusibong pakighinabi sa Bombo Radyo Butuan, gipadayag ni PLt. Ibn Rashid Injal, hepe sa Operations and Digital Forensic Section sa maong buhatan, gikan sa Enero hangtud karon, lapas na sa napulo ka mga kaso ang mi-abot sa ilang buhatan.
Tungod niini, kinahanglang bantayan og maayo sa mga ginikanan ang ilang kabataan pinaagi sa pag-monitor sa ilang mga online friends, pagsusi kanunay sa ilang social media accounts sama sa Facebook.
Pinaagi matud pa niini, masayran sa mga ginikanan kung unsa nga klase sa mga online friends nga anaa sa iyang account ug malikayan ang posibleng dili maayong mga mahitabo.
Kasagari matud pa sa mga dili ma-monitor nga online activity sa kabataan, ulahi nang masuta nga nabiktima na diay sila sa online grooming kondiin kuhaon ang ilang pagsalig pinaagi sa paghatag kanila og ginagmay nga kwarta, regalo ug atensyon adiser mahimo ang ilang dautang plano.
Dugang sa opisyal, mga minor-de-edad matud pa ang kasagaring biktima niini tungod kay dali ra silang linglahon.
Kini ilabina nga dali ra kaayo mag-profile sa mga tawong gusto nato nga mahimong target.
