BUTUAN CITY – Luwas nga nakabalik sa Pilipinas ang unom ka mga repatriated overseas Filipino workers gikan sa Iran.
Sayrang apektado ang nasangpit nga mga Pilipino sa kasamtangang kagubot sa Middle East partikular na sa giyera tali sa Israel ug Iran.
Sumala sa Department of Migrant Worker, lima sa mga niini kay nagtatrabaho isip shrimp hatchery technicians sa Iran, samtang ang usa, kay domestic worker gikan sa Dubai.
Nanguna sa pagsugat sa maong mga OFW’s sa Ninoy Aquino International Airport (NAIA) Terminal 3 sila Overseas Workers Welfare Administration (OWWA) Administrator Patricia Yvonne Caunan.
Kauban ni Caunan nga nisugat si Department of Foreign Affairs Undersecretary Eduardo de Vega ug DMW Assistant Secretary Venecio Legaspi.
Subay niini, naghatag gilayon ang maong mga opisyal og financial assistance gikan sa DMW, OWWA, ug DSWD.
Gihimo ang maong lakang pinaagi sa derektiba ni Presidente Ferdinand Marcos Jr. kansa una nang gipaniguro ang kaayuhan sa mga OFW sa Middle East, ug sa pagsigurong luwas kining makauli sa Pilipinas.
