BUTUAN CITY –Ningsaka na sa pito ka mga tawo ang kompirmadong patay dihang natumba ang mini dump truck sa Sitio San Juan, Barangay Guimbalaon, dakbayan sa Silay, Negros Occidental.
Subay sa inisyal nga imbestigasyon sa Silay City Police Station, lima ka tawo ang kompirmadong patay sa maong aksidente apan nadugangan kini og duha karong hapon, lima ang anaa sa kritikal nga kahimtang ug 13 ang nakaangkon og minor injuries.
Karga sa maong dumptruck ang 24 ka mga Job Order casual gikan sa Silay City Government nga nagpahigayon og tree planting activity sa Sitio Patag sa maong dakbayan.
Sa lima ka biktimang namatay, usa niini mao si Alexander Balili, usa ka city hall plumber, ug ang iyang sekretarya. Apil usab sa mga namatay sila Rafael Jardiolin Jr., Eldie Naguita ug usa ka wala pa mailhi nga sakay.
Sa kasamtangan, padayon pa ang imbistigasyon sa mga otoridad mahitungod sa maintenance records sa maong sakyanan, ug nanawagan ang lokal nga panggamhanan sa mga driver ug government offices nga siguruhon ang kahimtang sa ilang mga sakyanan aron malikayan ang susamang trahedya.
