BUTUAN CITY – Gibaraw ni Vice President Sara Duterte ang pamahayag sa pipila nga kinahanglang mag-inhibit ang mga Senador nga klarong pabor kaniya.
Sumala sa bise Presidente nga kung dili mu-apil sa impeachment trial ang mga Senador nga pabor kaniya, kinahanglan usab nga mag-inhibit kadtong dili pabor kaniya.
Gihimong ehemplo sa opisyal si Senadora Risa Hontiveros, kansa dayag matud pang kontra sa pamilya-Duterte. Panawagan pa sa bise Presidente, kinahanglang musalig na lamang ang katawhan sa mga senador nga himoon ang ilahang trabaho subay sa hustisya ug ka-angayan kansa usa sa ilang gisaad isip mga senator-judges.
Giklaro usab sa Bise Presidente ang pamahayag sa business sectors nga pagpakita lamang og accountability ang pagpadayon sa Impeachment. Sigon ni Duterte, dili accountability ang issue nga iyang gi-atubang tungod kay kon accountability ang gipangita sa iyang mga kalaban, sa korte sila angay muduol, ug dili sa impeachment court.
