BUTUAN CITY – Giandam na ang mga dokumento ug mga nakumpiskang ebidensya batok sa walo ka mga gidudahang membro sa New People’s Army kon NPA, kansa na-aresto sa gipatumang checkpoint sa Barangay Bunawan Brook, lungsod sa Bunawan, Agusan del Sur ning nakalabayng adlaw.
Sigon sa kapulisan, naaresto ang mga suspetsado human nakuha gikan kanila ang mga hinagiban ingon man mga subersibong dokumento. Kahinumdumang nasikop sa 10th Infantry Division sa Philippine Army, sa pakig-alayon sa Police Regional Office 13 ang Secretary sa Southern Mindanao Regional Committee kon SMRC – Regional Party, uban ang laing pito ka mga miyembro, niadtong Hunyo 13, 2025.
Giila ang mga dinakpang sila si Charisse Bernadine Bañez, alyas “Nikki,” Regional Party Secretary; Ronnie Igloria, alyas “Gideon,” Vice Commanding Officer; Louvaine Erika Espina, alyas “Pam,” medic sa yunit; Sinag Lugsi, alyas “Jomilyn”; Larry Montero, alyas “Laloy”; Daryl Man-Inday, alyas “Tonton”; Arjie Guino Dadizon, alyas “Ronron”, ingon man si Grace “Niknik” Man-aning, alyas “Jelyn”.
Tungod nini, gidayeg ni Major General Allan Hambala, Commander sa 10 Infantry Division sa Philippine Army, ang hapsay nga koordinasyon sa ilahang han-ay tali sa PRO-13.
