BUTUAN CITY – Plano sa kampo sa mga biktima sa war on drugs ni kanhi Pangulong Rodrigo Duterte nga babagan ang mosyon alang sa provisional release kon temporaryong kagawasan nga gihangyo niini ngadto sa International Criminal Court (ICC).
Sumala ni kanhi Bayan Muna Representative ug karon, usa sa mga abogado sa pamilya sa drug war victims nga si Atty. Neri Colmenares, ang pagbuhi sa kanhi presidente gikan sa ICC, mamahimong hulga ug harassment ngadto sa mga pamilya sa mga biktima. Dugang niini, makapasayon usab ang maong lakang sa pag-ikyas ni Duterte gikan sa hurisdiksyon sa ICC.
Sumala ni Colmenares, ipamugos sa mga biktima ang ilang katungod sa pagsubmite sa ilang kagustuhan nga babagan ang hangyo sa kanhi presidente. Dugang pa sa abogado, wala kini nahi-uyon sa Rome Statute ilabina nga kinahanglang makasiguro nga mutambong gayud ang kanhi pangulo sa trial, ug arun usab dili mabutang sa alanganin ang imbestigasyon sa korte.
Subay sa abogado, duna matud pay mga resources ug network of support ang kanhi pangulo nga mamahimong makatabang niini, ilabina nga nagpabiling impluwensyado ang iyang pamilya.
Subay ni Colmenares, usa na matud pa sa mga pamatuod nga walay lig-ong depensa ang kampo ni Duterte, ug dili kini andam nga sundon ang mando sa International Court, ang kanunay nga pagpangatake niini sa mga huwis sa ICC.
