BUTUAN CITY – Subling nanguna ang dakbayan sa Butuan sa dunay pinakataas nga kaso sa Human Immunodeficiency Virus kon HIV sa Caraga Region, subay sa katapusang datus sa Department of Health kon DOH.
Sa maong record, sukad niadtong tuig 1995 hangtud Pebrero ning tuiga, duna nay natalang 486 ka mga kaso sa HIV sa dakbayan sa Butuan nga gisundan sa Agusan del Sur nga dunay 341, Surigao del Sur nga dunay 261, ug Surigao City – 252.
Sumala sa maong datus, nag-unang rason niini, tungod sa Male to Male Sex nga dunay 1,203 ug gisundan usab sa Male to Male/Female Sex nga mi-abot sa 456 ka mga kaso. Sa kinatibuk-ang 1,858 ka mga kaso, 94-porsiento sa mga natakdan mga lalaki, samtang 6% lamang ang mga babaye.
Anaa usab sa edad 25 ngadto sa 34 anyos ang pinakadaghang natakdan nga mi-abot sa 96, samtang 684 niini ang gikan sa edad nga 15 ngadto sa 24 anyos.
Kahinumduman nga ningsaka ngadto sa 555% ang kaso sa HIV sa tibuok nasud hinungdan nga nanawagan ang DOH-Caraga ngadto sa publiko nga magpa-test kung adunay gibati nga mga simtomas sa HIV tungod kay libre ra man kini sa mga nagkada-iyang health centers ug mga ospital.
