BUTUAN CITY – Gi-awhag sa Department of Education kon DepEd-Butuan ang mga ginikanan nga mosalmot sa ipahigayong 2025 Brigada Eskwela nga sugdan karong adlawa isip preparasyon sa mga classrooms alang sa school year 2025-2026.
Una nang gi-anunsyo ni Domingo Nollora, ang Focal Person sa Brigada Eskwela sa Department of Education kon DepEd Butuan, nga sugdan na karong adlawa, Hunyo 09, ang pormal nga Division Kick-Off Ceremony niini nga himoon sa Antongalon Central Elementary School.
Dugang sa opisyal, ang mga ginikanan nga anaa sa layong lugar, mamahimo gihapon nga makighi-usa sa Brigada Eskwela pinaagi sa mga donasyon kansa ipaagi lamang sa mga Parents Teachers Association kon PTA, ingon man sa mga magtutudlo, o kaha sa Principal sa tunghaan.
Hinuon giklaro sa opisyal nga dili requirement sa admission sa mga magtutungha ang Brigada Eskwela tungod kay boluntaryo lamang kini o kaha donation, ugaling dunay ihatag.
Ning mga orasa usab, gisugdan na ang maong kalihukan pinaagi sa caravan nga gi-apilan sa mga internal ug external stakeholders sa Department of Education. Sugdan kini sa Libertad Sports Complex agi sa JC Aquino Avenue, ug tabok sa Magsaysay Bridge, dayon lusot sa Ampayon hangtod maabot ang Antongalon Central Elementary School.
Si Domingo Nollora, ang Focal Person sa Brigada Eskwela sa Department of Education kon DepEd Butuan.
