BUTUAN CITY – Patay ang Barangay Kapitan ug duha ka mga kagawad sa Barangay Salitran 3 sa Dasmariñas City human gipamusil kagahapon sa kanhi barangay tanod kinsa namatay usab human naghunos sa kaugalingong kinabuhi.
Nahitabo ang pagpamusil atul mismo sa flag-raising ceremony atubangan sa Barangay Hall sa nasangpit nga Barangay.
Subay sa imbistigasyon, kalit nga nibunot og pusil ang suspetsado dayong tiro sa Barangay Chairman nga si Raul Atarde Ballos, 56-anyos, ug gisunod ang mga kagawad nga sila si Jose Lagones, 65-anyos ug Marvin Canete.
Samdan usab ang Barangay Sangguniang Kabataan Secretary nga si Christine Joseph Bonus human kini na-igo dihang gigukod sa suspek ang mga biktima. Sumala sa kapulisan, ni-uli gilayon ang suspek sa iyang panimalay human sa ngilngig nga krimen, dayong tiro sa iyang kaugalingon rason nga lakip kini sa namatay.
Apan subay sa mga otoridad, misteryo pa alang kanila ang pagkawala sa gigamit nga pusil sa suspek. Subay in Police Captain Michelle Bastawang, Cavite Police Provincial Office public information officer, gitan-aw matud pa nilang anggulo ang panimalos human nga wala na sweldohi ang suspek niadtung Marso ning tuiga, tungod kay wala naman usab kini nakatrabaho tungod sa sakit nga diabetes.
Sumala sa mga nakasaksi, human sa pagpamusil, gipangita pa sa suspek ang Barangay Treasurer kansa maoy nag-hold sa iyang sweldo ug dihang wala na niya kini nakita, mipa-uli na kini sa ilang balay.
