BUTUAN CITY – Gimontar na sa Philippine National Police ang pinakabag-o niining Media Center sa matag-rehiyon sa Pilipinas.
Sumala ni PCaptain Fritzcel Cubillan, ang tigpamaba sa Butuan City Police Office, magsilbi kining tuburan sa rapid information dissemination, media coordination, ingon man public awareness alang sa eleksyon karong Mayo 12.
Pinaagi sa maong Media Center, makadirekta na og sumbong ang publiko sa kapulisan pinaagi sa pagtawag kanila sa mga numero nga makita sa ilang Facebook page ilabina kung makamatikod nga dunay anomaliya sa eleksyon.
Pinaagi sa Media Center, masibya in real time ang mga facts-based nga mga balita mahitungod sa eleksyon, ug mapukan ang mga peke nga mga balita kon fake news nga kaylap karon sa social media.
Giklaro sa opisyal, 24 oras matud pang naka-stand by ang nasangpit nga media center, samtang duna usab matud pa silay mga legal experts nga mutabang sa mga pribadong indibidwal ilabina sa mga sensitibong sumbong.
