BUTUAN CITY – Gimando na ni Pangulong Ferdinand Marcos Jr. ang hinanaling pag-ilis sa matud pa sub-standard nga mga bollard sa NAIA Terminal 1 human sa aksidente nga gikamatay sa duha ka mga indibidwal.
Sumala usab sa Malakanyang nga kinahanglang imbistigahan ang maong mga bollard, tungod kay ang maong mga materiales untana matud pa ang naka pugong sa sakyanan nga nideretso nga maoy gikamatay sa mga biktima ug gikaangul sa laing mga indibidwal.
Sumala ni Palace Press Officer USec. Claire Castro nga lakip sa mga lantawon sa maong isyu ang procurement ug specifications sa bollard nga gitaod sa entrada sa departure area, niadtung July, 2019, illawon sa Duterte Administration.
Sumala sa opisyal nga gimando na usab ni Presidnete Marcos Jr. ang paginspeksyon sa tanang bollard sa NAIA.
Subay niini, pailisdan gilayon ang mga nadaot nga bollard sa nasangpit nga paluparan isip proteksyon sa mga bisita sa nasangpit nga lugar.
DISGRASYA
Lakip sa namatay sa pagbangga sa usa ka SUV sa railings sa Ninoy Aquino International Airport Terminal 1 kon NAIA Terminal 1 niadtung alas 9 ang takna sa buntag sa Mayo 4, ang 4-anyos nga anak sa usa ka OFW nga palargahay na untana sa Pilipinas.
Sumala sa amahan nga giubanan lamang siya sa iyahang pamilya sa airport arun untana siya ihatud paggawas niini sa nasod.
Lakip sa namatay ang 29-anyos nga lalaki.
Sa inisyal nga tala, ubay-ubay usab ang nangaangol tungod sa maong disgrasya.
Kadaghanan sa mga nanga angul human na damay sa nasangpit nga pagdaro sa maong SUV kay mga Overseas Filipino Workers kon OFW nga pabiya na untana sa nasod, ingon man ang mga pamilya niini.
Sumala sa driver sa maong SUV nga pagawas na untana kini sa departure area dihang dunay sakyanan nga kalit lang nilabang sa iyahang atubangan rason nga natarantar siya, ug imbis nga break, gas pedal na hinoon ang iyahang natamakan.
Suspendido na ang lesinsya sa maong driver, ug sa kasamtangan, limitado lamang ang maka sulod sa maong dapit sa mga authorized personnel gikan sa New NAIA Infra Corp. (NNIC), Philippine National Police (PNP), ug Manila International Airport Authority kon MIAA Security nga nagpadayon sa lawom nga imbestigasyon.
Anaa na sa kustudiya sa mga kapulisan ang driver sa nasnagpit nga SUV alang sa tukmang disposasyon.
